மூன்று வேளாண் சட்டங்கள் வாபஸ் ஏன்?: மோடி விளக்கம்...!
* ''மூன்று வேளாண் சட்டங்களின் நன்மைகளை, விவசாயிகளுக்கு புரிய வைக்க முடியாமல் போனது வருத்தம் அளிக்கிறது.
* போராட்டத்தை கைவிட்டு, விவசாயிகள் தங்கள் வீடுகளுக்கு திரும்ப வேண்டும்,'' என, பிரதமர்வேண்டுகோள் விடுத்துள்ளார்.
விவசாயிகளின் வருமானத்தை அதிகரிக்கும் நோக்கில், மத்திய அரசு கடந்த ஆண்டு செப்டம்பரில் மூன்று விவசாய சட்டங்களை அறிமுகப்படுத்தியது.
* விவசாயிகள் விளைபொருட்கள் வணிகம் மற்றும் வர்த்தக மசோதா, அத்தியாவசிய பொருள்கள் சட்ட திருத்த மசோதா, விலை உத்தரவாதம் மற்றும் பண்ணைச் சேவை மசோதா ஆகிய மூன்று மசோதாக்கள், பார்லிமென்டின் இரு சபைகளிலும் நிறைவேற்றப்பட்டன.
* ஜனாதிபதி ஒப்புதல் அளித்ததையடுத்து இந்த சட்டங்கள் அமலுக்கு வந்தன.
* இதற்கு ஹரியானா, பஞ்சாப், உத்தர பிரதேசம் உள்ளிட்ட மாநிலங்களைச் சேர்ந்த விவசாய அமைப்புகள் கடும் எதிர்ப்பு தெரிவித்தன.
* **இந்த சட்டங்களை திரும்பப் பெறக்கோரி கடந்த ஆண்டு நவ., 26 முதல், டில்லியின் எல்லைகளில் மூன்று மாநிலங்களின் விவசாய அமைப்புகளைச் சேர்ந்தவர்கள் தொடர் போராட்டங்களை நடத்தினர். **
* விவசாய அமைப்புகளுடன் மத்திய அரசு 11சுற்று பேச்சு நடத்தியும், பிரச்னைக்கு தீர்வு ஏற்படவில்லை.
* இதற்கிடையில் இந்த சட்டங்களுக்கு எதிராக தாக்கல் செய்யப்பட்ட மனுக்களை விசாரணைக்கு ஏற்ற உச்ச நீதிமன்றம், மூன்று சட்டங்களையும் அமல்படுத்த இடைக்கால தடை விதித்தது; விவசாயிகளின் போராட்டமும் தொடர்ந்தது.
இந்நிலையில், 'டிவி' சேனல்கள் வாயிலாக பிரதமர் நரேந்திர மோடி நேற்று நாட்டு மக்களுக்கு உரையாற்றினார்.
**அப்போது அவர் பேசியதாவது:**
* என் 50 ஆண்டு கால பொதுப்பணியில் விவசாயிகளின் துயரத்தை உணர்ந்திருக்கிறேன்.
* அதனால் தான் மக்கள் என்னை பிரதமராக்கியதும், விவசாயிகள் நலனுக்கு முக்கியத்துவம் அளித்தேன்.
* விவசாயிகளுக்கு மண் ஆரோக்கிய அட்டைகள் வழங்கியுள்ளோம்; இது, விவசாய சாகுபடியை அதிகரிக்க உதவியுள்ளது.
* 'பசல் பீமா யோஜனா' என்ற பயிர் காப்பீடு திட்டத்தால், விவசாயிகளுக்கு 1 லட்சம் கோடி ரூபாய் இழப்பீடாக வழங்கப்பட்டுள்ளது.
* விவசாயிகளின் வங்கிக் கணக்கில் நேரடியாக நிதியுதவி செலுத்தும் திட்டத்தை செயல்படுத்தி வருகிறோம்.
* கிராமப்புற விவசாய சந்தை கட்டமைப்பு வலுப்படுத்தப் பட்டுள்ளது.
* 1,000 மண்டிகள் மின்னணு மண்டிகளாக மாற்றப்பட்டுள்ளன.
* விளை பொருட்களுக்கான குறைந்தபட்ச ஆதார விலை அதிகரிக்கப்பட்டுள்ளது.
* விவசாயிகளுக்காக நுண் பாசனத் திட்டத்துக்கான நிதி இரு மடங்காக அதிகரிக்கப்பட்டுள்ளது.
* விவசாயிகளின் நிதி நிலைமை மேம்பட நடவடிக்கைகள் எடுக்கப்பட்டுள்ளன.
* விவசாயிகளின் நலனுக்காகவே மத்திய அரசு மூன்று வேளாண் சட்டங்களை நிறைவேற்றியது.
* சிறு விவசாயிகள் முன்னேற்றம் அடையவும், அவர்களுக்கு அதிகாரம் அளிக்கவும், அனைத்து விவசாயிகள் சங்கத்தினருடன் ஆலோசித்த பின் தான், இந்த சட்டங்களை நிறைவேற்றினோம்.
* ஆனால், சட்டம் தொடர்பாக தவறான தகவல் பரப்பப்பட்டது.
* அதனால், விவசாயிகளின் ஒரு பகுதியினர் இந்தச் சட்டத்தை எதிர்த்து வருகின்றனர்,
* வேளாண் சட்டங்களின் நன்மைகளை விவசாயிகளிடம் விளக்கி எடுத்துச் சொல்ல முயற்சித்தோம்.
* போராட்டம் நடத்தும் விவசாயிகளுடன் பல சுற்று பேச்சு நடத்தினோம்.
* சில திருத்தங்களைக் கூட மேற்கொள்ளத் தயாராக இருப்பதாகக் கூறினோம்.
* ஆனால், போராட்டம் நடத்தும் விவசாயிகளிடம் வேளாண் சட்டங்களுக்கான ஆதரவை பெற முடியவில்லை.
* **எங்களின் முயற்சிகள் தோல்வியடைந்தன. இதற்காக மன்னிப்பு கேட்கிறேன்.**
* அதனால், மூன்று வேளாண் சட்டங்களையும் வாபஸ் பெற முடிவு செய்துள்ளோம்.
* இது தொடர்பான நடவடிக்கைகள், வரும் பார்லிமென்ட் குளிர்கால கூட்டத் தொடரில் மேற்கொள்ளப்படும்.
* இதனால் விவசாயிகள் போராட்டத்தை கைவிட்டு, தங்கள் வீடுகளுக்கு திரும்ப வேண்டும்.
* ***நான் எதை செய்தேனோ, அதை விவசாயிகளின் நலனுக்காகவே செய்தேன். நான் என்ன செய்து கொண்டிருக்கிறேனோ, அதை தேசத்துக்காகவே செய்கிறேன்.***
* இந்த தேசத்தின் கனவுகளும், உங்களின் கனவுகளும் நனவாவதற்காக இன்னும் கடினமாக உழைப்பேன்.
* விவசாயிகளின் நலனும், விவசாய மேம்பாடும் தான் எங்களின் பிரதான பணி.நாட்டில் விவசாயத் துறையை மேம்படுத்த, பல்வேறு நடவடிக்கைகள் எடுக்கப்படும்.
* குறைந்தபட்ச ஆதார விலையை வலுப்படுத்த விவசாயிகள், வல்லுனர்கள், விஞ்ஞானிகள் அடங்கிய குழு அமைக்கப்படும். இவ்வாறு பிரதமர் பேசினார்.
# **போராட்டம் இன்னும் முடியவில்லை**
**பாரதிய கிசான் யூனியன் தலைவர் ராகேஷ் திகாயத் கூறியதாவது:**
* மூன்று விவசாய சட்டங்களை வாபஸ் பெறுவதாக பிரதமர் அறிவித்திருப்பது, நாங்கள் ஓராண்டாக நடத்தி வந்த போராட்டத்துக்கு கிடைத்த வெற்றி.
* இந்த போராட்டத்தில் உயிரிழந்த 750க்கும் மேற்பட்ட விவசாயிகளுக்கும், போராட்டத்தில் பங்கேற்ற பழங்குடியினர், தொழிலாளர்கள், பெண்களுக்கும் இந்த வெற்றியை சமர்ப்பிக்கிறோம்.
* எங்கள் போராட்டம் இன்னும் முடியவில்லை.
* விவசாய சட்டங்களை வாபஸ் பெறும் மசோதாவை, பார்லி.,யின் இரு சபைகளிலும் நிறைவேற்ற வேண்டும்.
* குறைந்தபட்ச ஆதார விலை உத்தரவாத சட்டம் உருவாக்கப்பட வேண்டும்.
* அப்போது தான் போராட்டத்தை முடிப்போம். இவ்வாறு அவர் கூறினார்.
**மத்திய வேளாண் அமைச்சர் கூறுவது என்ன?**
புதுடில்லி ;மத்திய விவசாய துறை அமைச்சர் நரேந்திர சிங் தோமர் கூறியதாவது:
* விவசாயிகள் தங்களின் உற்பத்தி பொருட்களை விற்பதில் உள்ள தடைகளை நீக்கும் நோக்கிலும், சிறு, குறு விவசாயிகளின் நலன் கருதியும், மூன்று சட்டங்களை மத்திய அரசு கொண்டு வந்தது.
* பார்லி.,யில் நிறைவேற்றப்பட்ட இந்த மூன்று சட்டங்களும் விவசாயிகளுக்கு பெரும் பலன் அளிக்க கூடியவை.
* விவசாயிகளின் வாழ்க்கையில் பெரும் மாற்றத்தை ஏற்படுத்த வேண்டும் என்ற எண்ணத்தில் தான், இந்த சட்டங்கள் கொண்டு வரப்பட்டன.
* விவசாய அமைப்புகளிடம் இந்த சட்டங்களின் பலன்கள் பற்றி எடுத்துக் கூறியும், அவர்களை ஏற்க வைக்க முடியாமல் போனது பெரும் வருத்தம் அளிக்கிறது.
* விவசாயிகள் நலனில் மத்திய அரசு பெரும் அக்கறை வைத்துள்ளது.
* அவர்களின் சம்மதத்தை பெற முடியாமல் போனதால், மூன்று சட்டங்களை வாபஸ் பெறும் முடிவு வரவேற்கத்தக்கது.இவ்வாறு அவர் கூறினார்.
# **வாபஸ் பெறுவது எப்படி?**
**சட்டத்துறை முன்னாள் செயலர் பி.கே.மல்ஹோத்ரா கூறியதாவது:**
* அரசியலமைப்பு சட்டப்படி எவ்வாறு சட்டம் இயற்றப்படுகிறதோ, அதே முறையில் தான் சட்டத்தை திரும்ப பெறவும் வேண்டும்.
* அரசியலமைப்பு சட்டத்தின் 245வது பிரிவு, பார்லி.,க்கு சட்டங்களை இயற்றவும், அதை திருத்தம் செய்து திரும்ப பெறவும் அதிகாரம் வழங்கியுள்ளது.
* வேளாண் சட்டங்களை மத்திய அரசு இரு வழிகளில் வாபஸ் பெற முடியும். சட்டங்களை திரும்ப பெறுவதற்கான மசோதாவை, பார்லி.,யின் இரு சபைகளிலும் நிறைவேற்றுவது முதல் வழி.
* அவசர சட்டம் பிறப்பித்து, மூன்று சட்டங்களையும் திரும்ப பெறுவது இரண்டாவது வழி.
* ஆனால், அடுத்த ஆறு மாதத்துக்குள் அந்த அவசர சட்டத்துக்கு பதிலாக மசோதா தாக்கல் செய்து, பார்லிமென்டில் நிறைவேற்ற வேண்டும்.
இவ்வாறு அவர் கூறினார்.
**இதற்கு முன் வாபசான மசோதாக்கள்**
* இதற்கு முன் பார்லிமென்டில் நிறைவேற்றப்பட்ட பின், பல மசோதாக்கள் வாபஸ் பெறப்பட்டுள்ளன. அதில் முக்கியமான இரண்டு மசோதாக்கள்:
* * காங்கிரசைச் சேர்ந்த ராஜிவ் பிரதமராக இருந்த போது, 'இந்திய தபால் அலுவலக திருத்த மசோதா' பார்லிமென்டின் இரு சபைகளிலும் நிறைவேற்றப்பட்டது.
* பெரும் சர்ச்சையை ஏற்படுத்திய இந்த மசோதாவுக்கு ஒப்புதல் அளிக்க, அப்போது ஜனாதிபதியாக இருந்த ஜெயில் சிங் மறுத்தார். இதையடுத்து மசோதா வாபஸ் பெறப்பட்டது.
* * ராஜிவ் பிரதமராக இருந்த போது, 1988ல் பத்திரிகையாளர்களுக்கு எதிராக 'அவதுாறு மசோதா' லோக்சபாவில் நிறைவேற்றப்பட்டது.
* கடும் எதிர்ப்பால் ராஜ்யசபாவில் நிறைவேற்ற முடியாமல் மசோதா வாபஸ் பெறப்பட்டது.
* * கடந்த 2015ல் எதிர்க்கட்சிகளின் எதிர்ப்பு காரணமாக நிலம் கையகப்படுத்துதல் மற்றும் மீள்குடியேற்ற மசோதா தொடர்பாக கொண்டு வரப்பட்ட அவசர சட்டத்தை, பிரதமர் மோடி தலைமையிலான அரசு வாபஸ் பெற்றது.
