ஆன்லைனில் இணையும் கிராமங்கள்....! பிரதமர் மோடி அறிவித்துள்ள புதிய திட்டத்தின் பயன் என்ன....?
நாட்டின் உள்கட்டமைப்பை வலுப்படுத்தும் கதி சக்தி திட்டத்தை சுதந்திர தின உரையின்போது பிரதமர் நரேந்திர மோடி அறிவித்தார்.
இத்திட்டத்தின் மாஸ்டர் பிளானை வரும் அக்டோபர் 13ம் தேதி பிரதமர் வெளியிடவுள்ளார்.
கடந்த ஆகஸ்ட் 15ம் தேதி நாட்டின் 75வது சுதந்திர தினத்தையொட்டி பிரதமர் நரேந்திர மோடி ஆற்றிய சுதந்திர தின உரையில்,பிரதம மந்திரி கதி சக்தி தேசிய திட்டம் மூலம் புதிய பொருளாதார மண்டலங்களை அமைப்பதற்கான சாத்தியக்கூறுகள் உருவாக்கப்படும் என்ற அறிவிப்பை வெளியிட்டார். இந்த திட்டம் ரூ.100 லட்சம் கோடி மதிப்பில் அமல்படுத்தப்படும் என்றும் அவர் கூறியிருந்தார்.
இத்தகைய மெகா திட்டமான கதி சக்தி திட்டத்தின் மாஸ்டர் பிளானை வரும் 13ம் தேதி பிரதமர் மோடி வெளியிடவுள்ளார். 2024-25 க்குள் இந்தியாவுக்கான மெகா உள்கட்டமைப்பு மற்றும் இணைப்பு இலக்குகளை எட்ட இந்த திட்டம் உதவும்.
2 லட்சம் கிலோமீட்டர் தேசிய நெடுஞ்சாலைகள், 1,600 மில்லியன் டன் சரக்குகளை கையாளும் ரயில்கள், எரிவாயு குழாய் நெட்வொர்க்கை 35,000 கிமீ வரை இரட்டிப்பாக்குதல், மொத்தம் 220 விமான நிலையங்கள், ஏர் ஸ்ட்ரிப்ஸ் மற்றும் ஏரோட்ரோம்களை கொண்டிருத்தல், 11 தொழில்துறை தாழ்வாரங்கள் உட்பட தொழில்களுக்காக 25000 ஏக்கர் பரப்பளவில் உருவாக்கப்படும் இடங்கள், பாதுகாப்பு உற்பத்தியில் ரூ 1.7 லட்சம் கோடி விற்றுமுதல் அடைவது மற்றும் 2024-25 க்குள் 38 மின்னணு உற்பத்தி கிளஸ்டர்கள் மற்றும் 109 மருந்து உற்பத்தி கிளஸ்டர்களைக் ஏற்படுத்துவது போன்றவற்றை கதி சக்தி திட்டம் கொண்டுள்ளது.
முன்மொழியப்பட்ட தேசிய மாஸ்டர் பிளானில், தற்போதுள்ள மற்றும் முன்மொழியப்பட்ட அனைத்து பொருளாதார மண்டலங்களும் மல்டிமோடல் இணைப்பு உள்கட்டமைப்புகளுடன் மூன்று கால அளவுகளில் ஒரே பிளார்ஃபார்மின் கீழ் வரைபடமாக்கப்பட்டுள்ளன. மேலும், இந்த விரிவான வரைபடம் நாடு முழுவதும் பல்வேறு பொருளாதார மண்டலங்கள், உள்கட்டமைப்பு ஆகியவற்றின் நிறைவு காலவரிசைகளின் அடிப்படையில் கழுகு பார்வையில் உள்கட்டமைப்பு வளர்ச்சியை வழங்கவுள்ளது.
16 மத்திய அரசின் துறைகள் கதி சக்தி திட்டத்தின் ஒரு பகுதியாக உள்ளன. 2024-25 வரை வளர்ந்து வரும் தேவைகளை பூர்த்தி செய்ய மாஸ்டர் பிளானில் ஏதேனும் மாற்றங்களை அங்கீகரிப்பதற்காக அமைச்சரவை செயலாளர் தலைமையில் இந்த அனைத்து துறைகளின் அதிகாரமளிக்கப்பட்ட குழுவை (EGoS) அரசாங்கம் அமைக்கவுள்ளது.
மூத்த அதிகாரிகளுடன் ஒருங்கிணைந்த மல்டிமோடல் நெட்வொர்க் திட்டமிடல் குழு (NPG) இந்த திட்டங்களின் ஒருங்கிணைந்த திட்டமிடல் மற்றும் ஒருங்கிணைப்புக்கு பொறுப்பேற்று செயல்படும். மேலும், மாஸ்டர் பிளானுக்கு வெளியேவுள்ள 500 கோடி ரூபாய் மதிப்பிலான உள்கட்டமைப்பு இணைப்பு திட்டங்களை இந்த குழு கண்காணிக்கும்.
2 லட்சம் கிமீ தேசிய நெடுஞ்சாலைகள், கடலோர பகுதிகளில் 5,590 கிலோ மீட்டருக்கு நான்கு அல்லது ஆறு வழிச்சாலை தேசிய நெடுஞ்சாலைகள், வடகிழக்கில் உள்ள அனைத்து மாநில தலைநகரங்களையும் நான்கு அல்லது இரண்டு வழி தேசிய நெடுஞ்சாலைகளுடன் இணைக்க இலக்கு நிர்ணயிக்கப்பட்டுள்ளது. ரயில்வேயை பொருத்தவரை, 2024-25 க்குள் 1,600 மில்லியன் டன் சரக்குகளை கையாள இலக்கு நிர்ணயிக்கப்பட்டுள்ளது.
மேலும், பொது-தனியார் கூட்டு முறையில் 4000 கிலோ மீட்டருக்கு கட்டப்படும் கிழக்கு-மேற்கு, வடக்கு-தெற்கு மற்றும் கிழக்கு கடற்கரை அர்ப்பணிக்கப்பட்ட சரக்கு வழித்தடங்கள்களின் விரிவான திட்ட அறிக்கைகள் தயாரிக்கப்பட உள்ளன.
வான் போக்குவரத்தை பொருத்தவரை 2025ம் ஆண்டுக்குள் நாட்டில் உள்ள விமான நிலையங்கள், ஹெலிபோர்ட்ஸ் மற்றும் நீர் ஏரோட்ரோம்களின் எண்ணிக்கையை 220 ஆக உயர்த்த இலக்கு நிர்ணயிக்கப்பட்டுள்ளது. 2024-25ம் ஆண்டில் துறைமுகங்களின் சரக்கு கையாலும் திறனை ஆண்டுக்கு 1,759 மில்லியன் மெட்ரிக் டன்னாக உயர்த்த இலக்கு நிர்ணயிக்கப்பட்டுள்ளது. கங்கை நதியின் சரக்கு போக்குவரத்தை 29 மில்லியன் மெட்ரிக் டன்னாக உயர்த்தவும் இலக்கு நிர்ணயிக்கப்பட்டுள்ளது.
அனைத்து கிராமங்களையும் இணைக்கும் வகையில் 35 லட்சம் கிலோமீட்டருக்கு ஆப்டிகல் ஃபைபர் நெட்வொர்க் அமைக்க இலக்கு வைக்கப்பட்டுள்ளது. 2022ம் ஆண்டுக்குள் 4ஜி சேவை அனைத்து பகுதிகளுக்கு கிடைக்க திட்டமிடப்பட்டுள்ளது.
தமிழகம் மற்றும் உத்தரப் பிரதேசத்தில் தலா ரூ.10 ஆயிரம் கோடி முதலிட்டில் ஆயுத தயாரிப்பு தளவாடங்கள் அமைக்க மத்திய அரசு திட்டமிட்டுள்ள நிலையில், அது தொடர்பான அறிவிப்புகளும் கதி சக்தி திட்டத்தில் இடம்பெறும் என எதிர்பார்க்கப்படுகிறது. 2025 க்குள் விண்வெளி மற்றும் பாதுகாப்பு பொருட்கள் மற்றும் சேவைகளில் ரூ. 35,000 கோடி ஏற்றுமதி உட்பட ரூ .1,70,000 கோடி வருவாய் ஈட்ட இலக்கு நிர்ணயிக்கப்பட்டுள்ளது.
