பிரேமலதா  விஜயகாந்த் போட்டியிடும் தொகுதிகள் இவை தான்? பின்னணி தகவல்!

அதிமுக கூட்டணியில் அங்கம் வகிப்பதாக கூறிக்கொண்டிருக்கும் தேமுதிக அவ்வப்போது தனித்துப் போட்டியிடத் தயார் என்றும் பேசி வருகிறது.

• இந்நிலையில் தேமுதிக சார்பில் விருப்ப மனு விநியோகிக்கப்படுவது குறித்த அறிவிப்பு வெளியானது. “தமிழகம், புதுச்சேரி தேர்தல்களில் தேமுதிக சார்பில் போட்டியிட பிப்.25 முதல் மார்ச் 3 ஆம் தேதி வரை காலை 10 மணி மாலை 5 மணி வரை விருப்பமனு அளிக்கலாம். தமிழ்நாடு சட்டமன்ற தொகுதிகளுக்கு ரூ.15 ஆயிரம், தனித்தொகுதிக்கு ரூ.10 ஆயிரம் கட்டணம் நிர்ணயிக்கப்பட்டுள்ளது. புதுச்சேரி சட்டமன்றத்தொகுதிக்கு ரூ.10 ஆயிரம், தனித்தொகுதிக்கு ரூ.5 ஆயிரம் செலுத்தி விண்ணப்பிக்கலாம்” என்று தெரிவிக்கப்பட்டுள்ளது.
• விஜயகாந்த் உடல்நிலை நலிவுற்றதிலிருந்து முக்கிய கூட்டங்களில், பிரச்சாரங்களில் பிரேமலதாவே முன்னிறுத்தப்படுகிறார். கட்சியிலும் முக்கிய பொறுப்பு அவருக்கு வழங்கப்பட்டுள்ளது. இந்நிலையில் இந்த முறை அவர் தேர்தலில் போட்டியிடவுள்ளதாக ஏற்கெனவே செய்திகள் வெளியாகியிருந்தது.
  
  இது குறித்து சமீபத்தில் கருத்து தெரிவித்த பிரேமலதா, “நிர்வாகிகள் விரும்பினால், கேப்டன் ஆணையிட்டால் நான் தேர்தலில் நிற்பேன்” என்று கூறினார்.
  
  இந்தத் தேர்தலில் பிரேமலதா களமிறங்குவது உறுதியாகிவிட்டதாக கூறுகின்றனர் தேமுதிக வட்டாரத்தில். அதிலும் குறிப்பாக விஜயகாந்த் முதன்முறையாக போட்டியிட்டு வெற்றி பெற்ற விருத்தாச்சலம் தொகுதியில் பிரேமலதா போட்டியிடவுள்ளதாக கூறுகின்றன்றனர். இவரும் முதல்முறை வெற்றிக் கனியை பறிக்க வேண்டும் என திட்டம் வகுக்கின்றனர்.
  
  அதேபோல் சென்னையில் விஜயகாந்தின் இல்லம் அமைந்துள்ள விருகம்பாக்கம்  தொகுதியில் இந்த முறை விஜயகாந்த் போட்டியிடுவார் என்று கூறப்படுகிறது. அவ்வப்போது வெளியில் தலைகாட்டினாலும் முன்பு போல் விஜயகாந்த் உரையாற்றுவதில்லை. மேலும் நீண்ட தூரம் பிரச்சாரம் மேற்கொள்ளவதில் உள்ள சிரமத்தை போக்கும் வகையிலேயே விஜயகாந்த் விருகம்பாக்கத்தில் களமிறங்கவுள்ளதாக கூறுகின்றனர்.